سفر الأطباء للخارج

السفر الى بريطانيا دليل كامل للأطباء للحصول على وظيفة ثابتة فى بريطانيا

السفر الى بريطانيا يعتبر من افضل الطرق المتاحة للأطباء للعمل فى الخارج.

هل تعلم ان فيه مستشفيات بتقفل في انجلترا ، و سيادتك قاعد هنا رايح جاي بين مدام منال و استاذ سيد علشان تضمي ورقة!!؟
ايوة زي ما سمعت كدا … انجلترا فيها عجز شديد جدا ف عدد الاطباء بقالها فترة علشان كدا بدأوا يعملوا شوية تعديلات وتسهيلات زي ان المجلس الطبي العام GMC بالمملكة المتحدة ( حاجة زي مجلس الاختصاصات عندنا ف مصر ) اعلن عن الغاء شرط الحصول علي شهادة الـ IELTS كشرط اساسي فى السفر الى بريطانيا و العمل هناك و اعلن انه اصبح يقبل شهادة الـ OET اللي تعتبر اسهل من الايلتس بمراحل.

شهادة الـ OET اصبحت تغنى عن شهادة IELTS للسفر الى بريطانيا

دة كمان عملوا تسهيلات ع الفيزا و خفضوا رسوم الامتحانات !!! نعملك ايه اكتر من كدا علشان تيجي !؟

فى المقال دة قررنا نساعدك لو الفكرة كبرت ف دماغك و هنعرفك باذن الله طريق السفر الى بريطانيا و ازاى تشتغل هناك ، المقال طويل شوية بس هيبقي زي مرجع شامل باذن الله.

مميزات السفر و العمل للأطباء فى الممكلة المتحدة

  • انجلترا عموما دولة جميلة جدا تابعة للمملكة المتحدة، دولة محترمة بتحترم و ترعي مواطنيها و فيها قانون بيطبق ع الكل.
  • عملك كطبيب بعد السفر الى بريطانيا شيء مهم جدا و هتحس فعلا هناك انك طبيب بجد، و هتعيش حياة كريمة فعلا باذن الله .
  • دة غير الخبرات العلمية و العملية اللي هتكتسبها و اللي هترفع من درجتك العلمية بشكل كبير جداً .
  • رواتب الأطباء فى المملكة المتحدة مرتفعة و هتمكنك من عيش حياة كريمة جدا ليك ولاسرتك لو معاك ومكمل هناك باذن الله.

رواتب الأطباء فى المملكة المتحدة ( انجلترا )

صعوبات ممكن تواجهك قبل وبعد سفرك للمملكة المتحدة

زى ما فيه مميزات للسفر و العمل كطبيب فى بريطانيا ، أكيد هتقابلك بعض الصعوبات قبل و بعد سفرك هناك. لكن اكيد الموضوع بيبقى مختلف من شخص للتانى و كمان هنساعدك تتغلب عليها ان شاء الله.

  • التكلفة المرتفعة بعض الشىء للتحضير و انجاز متطلبات السفر.
  • محتاج وقت و مجهود مش قليل علشان تذاكر سواء لغة او تحضر زمالة او معادلة بريطانية.
  • تكلفة المعيشة المرتفعة بعض الشىء فى الممكلة المتحدة. | ما هى تكلفة السفر و المعيشة فى انجلترا للأطباء.
  • ممكن تحتاج بعض الوقت لحين الحصول على وظيفة تدريبية ثابته هناك.

لكن باذن الله فى المقال دة هنحاول نوضح لك كل حاجة و نساعدك تواجه كل الصعوبات الممكنة اللى ممكن تقابلك.

متطلبات السفر و العمل فى الممكلة المتحدة

قبل اى حاجة فيه شروط يجب توافرها قبل ما تفكر للسفر الى بريطانيا، وهى :

  • ان تكون خريج احد الجامعات المعتمدة دولياً، و تقريبا اغلب الجامعات المصرية معتمدة و الحمد لله.
  • انك تكون خلصت فترة التدريب بعد الكلية ( سنة الإمتياز ) و معاك شهادة الإمتياز.
  • شهادة لغة OET بسكور B على الأقل ، او شهادة IELTS بسكور 7.5 على الأقل.
  • شهادة معادلة بريطانية او شهادة زمالة بريطانية فى التخصص.

الحمد لله حالياً جميع الجامعات المصرية معتمدة، و مفيش شرط للحصول على تقدير معين للسفر و الحصول على عمل. دة بالإضافة الى ان شهادة الإمتياز ( فترة التدريب ) معتمدة و هتغنيك عن سنة تدريبية هناك.

دلوقتى اول حاجة تفكر فيها انه لازم يكون معاك او ع الأقل بتحضر للحصول علي شهادة الـ IELTS بسكور 7.5 او شهادة الـ OET بسكور B. و من وجهة نظرى المتواضعة و من خلال خبرات البعض ان الحصول على شهادة الـ OET اسهل بكتير من الحصول على شهادة الـ IELTS. يمكن تكون تكلفتها أعلى شوية لكن مضمون فيها النجاح باذن الله.

وتقدر تعرف أكتر عن شهادة الـ OET من خلال اللينك دة | تم التحديث:معلومات سريعة عن اختبار و شهادة OET 2.0 و تقدر تعرف الفرق بين الشهادتين من خلال اللينك دة | ما هو الفرق بين اختبار الـ IELTS و الـ OET ؟

بنجاحك فى الحصول على شهادة اللغة اقدر اقول انك الحمد لله ضمنت السفر بنسبة 50 % ، و اصبح الطريق قدامك ميسر ان شاء الله.

الحقيقة انك ادامك اكتر من طريق و فرصة للسفر و العمل كطبيب فى المملكة المتحدة، سواء انك تبدأ تبحث عن وظائف مطلوبة للأطباء هناك و تقدم عليها و دة صعب شوية او انك تعادل شهادة البكالوريوس بشهادة الطب هناك من خلال الحصول على شهادة المعادلة البريطانية PLAB، و اللى من وجهة نظرى المتواضعة انه افضل و اضمن طريق بالرغم من انه طويل شوية.

المعادلة البريطانية (الشروط والمميزات،نظام وتكلفة الامتحانات)

المعادلة البريطانية (الشروط والمميزات،نظام وتكلفة الامتحانات)

اللينك اللى فات بيتكلم عن معلومات سريعة عن امتحانات المعادلة البريطانية مميزاتها و شروطها وتكلفة و نظام الامتحانات، و هتقدر من خلاله تاخد خلفية عن الطريق اللى هتمشى فيه باذن الله.

و اكيد طبعاً سمعت عن الزمالة البريطانية، لكن ايه الفرق بين الزمالة البريطانية و شهادة المعادلة البريطانية !!؟ و ايه الأفضل للسفر و العمل فى الممكلة المتحدة.

أول حاجة انصحك تشوف المقال دة | معلومات سريعة عن الزمالة البريطانية و اللى بيتكلم بشكل سريع عن مفهوم الزمالة البريطانية.. و كمان انصحك بالإطلاع ع المقال دة | زمالة بريطانية ام معادلة بريطانية!!؟ MRCP vs PLAB و اللى هيوضحلك الفرق ما بين الشهادتين.

لكن انا دايما نصيحتى لضمان وظيفة ثاتبة و طريق مرسوم واضح هو انك تاخد الطريق من اوله من خلال المعادلة البريطانية.

نفترض ان حضرتك الحمد لله خلصت بالفعل او قربت تخلص امتحانات اللغة، يبقي على طول تبدأ تجهز نفسك و تحجز لامتحان الجزء الاول من المعادلة البريطانية PLAB1 | PLAB 1 – ازاى تحجز لامتحان الجزء الأول من المعادلة البريطانية PLAB 1

و تبدأ تحضر و تذاكر ان شاء الله ، و هتلاقى فى المقال دة كل المصادر المتاحة و ازاى تضمن النجاح فى امتحان الجزء الأول من المعادلة البريطانية | PLAB 1 – ازاى تحضر نفسك و تذاكر لإمتحان الجزء الأول من المعادلة البريطانية PLAB 1

حضرتك امتحنت PLAB 1 ونجحت فيه الحمد لله يبقي حطيت رجلك علي اول الطريق خلاص و ضمنت السفر لانلجترا … واول حاجة هتعملها بعد كدا هي انك تجهز نفسك للسفر لامتحان PLAB 2 الجزء التاني من المعادلة البريطانية و اول حاجة محتاج تعملها قبل ما تسافر هي انك تقدم علي تأشيرة سفر لبريطانيا و هتلاقي ع اللينك دة ، كل التفاصيل عن تأشيرة السفرلبريطانيا الخطوات و التكلفة و الأوراق المطلوبة.  الحصول على فيزا ( تأشيرة ) للسفر الى بريطانيا لامتحان PLAB 2

ورقك ، وفيزتك ، تذكرتك ، فلوسك ،، وشنطة هدومك و علي لندن عدل ..مبروك!! انت وصلت لندن .. ايوة بجد انت فـ لندن

 لا متخافش كدا وانشف انت عديت الصعب و قطعت شوط كبير اوي و اللي جاي اسهل وافضل بكتير..
صدقني من لحظة وصولك لندن انت حياتك اتغيرت تماما ،، انا كمان مكمل معاك ف المقال ومش هاسيبك كلنا جمبك و بنشجعك تكمل و بنحييك علي كل اللي وصلتله ،،

ف لندن انت ممكن تكون عارف حد من اهلك او قرايبك او اصحابك هناك و اللي هيساعدك بشكل كبير ع الاقامة و التنقل داخل لندن انت كدة مش محتاج حاجة تانية الحمد لله
طيب لو انت لواحدك !!؟ ما انا قلتلك انت مش لواحدك احنا كلنا معاااك …
طبعا ف لندن لو متعرفش حد هتبقي تايه مش عارف هتسكن فين و لا هتروح وتيجي منين !!؟
علشان كدة لازم تشوف اللينك دة ، واللي بيتكلم عن الإقامة و التنقل في لندن منذ لحظة وصولك المطار…  الإقامة و التنقل فى لندن بعد السفر لامتحان PLAB 2

حمد الله ع السلامة يا بطل مع نفسك بأة، ايوة مع نفسك انا كدة عملت اللي عليا و زيادة انت ايه مش هتعتمد علي نفسك شوية بأة 😀 ، ما كنت سافرت مكانك انا وخلاص 😀

متقلقش وتوكل علي الله واعقد النية وهتلاقي الامور كلها ميسرة معاك
انت فعلا مش محتاج حاجة تانية ،، من بعد وصولك واستقرارك ف لندن هتلاقي الامور ماشية واحدة واحدة ورا بعضها لحد ما تخلص ال PLAB 2 و تبدأ شغلك وحياتك المستقرة ف لندن.

كمان انصحك تقرأ المقال دة | دليل كامل لمفهوم النيابات و التخصص للأطباء فى بريطانيا و اللى هيفهمك اكتر الدنيا هتمشى معاك هناك ازاى بعد PLAB 2 و حصولك على شهادة المعادلة البريطانية بنجاح. و بداية انضمامك للنظام الطبى فى المملكة المتحدة.

الوسوم

اترك تعليقاً

زر الذهاب إلى الأعلى
إغلاق