من اكثر المكالمات الحزينة في حياتي
.. المكالمة بدات بحوار علي الفيس مع ام طفل مريض سكر وكمان دكتورة هي من الاصدقاء علي الصفحة فمش هازكر اي معلومة عنها بس هازكر القصة بناء علي طلبها عشان الاطباء الزملاء يستفيدوا منها... الدكتورة عرفتني بنفسها وفي صديق مشترك بينا اخ يكبرني سنا وعلما ومكانة طبعا لما قالت اسمه افتكرته بكل خير.. طلبت رقم تليفوني.. طبعا ادتهولها انا بااعترف اني ببقي ضعيف امام اي حد من الاطباء الزملاء حتي لو لم اعرفه او اقابله مطلقا..
وافقت علي الفور.. بعدها بشوية كلمتني الزميلة الفاضلة وفكرتني بنفسها.
.. طبعا افتكرتها علطول فبقولها لو حاضرتك عاوزاني اساعدك في اي معلومة او حاجة عن ابنك بس اعمليلي جدول تحاليل ثلاث ايام بمعدل ٧ مرات قياس يوميا.
.. قاطعتني بحزن ان ابني اتوفي من شهرين.
.. الحقيقة انا كنت بحاول ابقي متماسك بس الكلمة نزلت عليا كالصاعقة مع نبرة الحزن اللي اكتسي بها صوتها.
.. انا شفت صورته فيما بعد ربنا يصبرها ملاك وسيم ربنا يرحمه يارب.
.. مريض سكر من ٧ سنوات ملتزم جدااا والام والاب اطباء وملتزمين وفاهمين كل حاجة عن المرض.. ما اتحجزش ولا مرة في مستشفي.
.. طبعا هي عارفة معني الاسيتون والحموضة بس ماجربتش احساسهم عند الملاك قبل كدا لانه كان طفل ذكي متفهم لمرضه جدا وكان رياضي بيحافظ علي نفسه.
..الكارثة كلها حصلت في اقل من ٢٤ ساعة وهو دا اللي مقطع قلبها انا طبعا كنت بحاول اصبرها بس عارف ان قلب الام مهما عملت غصب عنها.
.. الولد صحي علي حرارة عالية وترجىع غير معتاد.
.. في الاول قاست سكره كاول احتمال طلع ١٤٠ مجم.
.. راحت مستشفي خاص لها اسم رنان بالطفل والاستشاري كشف عليه وقالتله عنده السكر بس لما سالها كام سكره وقالت ١٤٠ مجم قال خلاص يبقي مالوش علاقة.
.. وكتب علاج للسخونة والترجيع وقال ممكن يتحجز.. الام طبيبة سالته سؤال معتاد ممكن اعمل دا في البيت كل الرعاية ليه هاوفرها.. قالها عادي مافيش مشاكل.
.. الولد مستمر في الترجيع مابيستجبش لزوفران او غيره.. هو قالها نضيف زانتاك طبيعي الترجيع مع اي التهاب او عدوي.
.. هنا انا قاطعتها بحسم euglycemic ketoacidosis.
.. سكتت لاني فكرتها بالحالة... هي دي اللي اتعلمتها في معهد السكر وفي شغلي في وحدك الغدد والسكر في ابو الريش من اصعب حالات سكر النوع الاول ودايما بختم بيها كلامي لاي نايب جديد وانا بشرحله لاول مرة عن السكر في الاطفال والمراهقين.
معناها ايه.. ببساطة اسيتون وحموضة بالدم علي سكر طبيعي.
.. يعني السكر بيبقي اقل من 200 مجم وعلي الرغم من كدا بيبقي فيه اسيتون وحموضة بالدم.
.. عشان كدا بقول لاي ام حتي لو ابنك سكره طبيعي ولقيتي فيه ترجيع والم في معدته متكرر.. اعملي تحليل اسيتون في البول.
.. دي كمان بنشوفها في بعض الحالات لما الام تكتشف ان ابنها اسيتون 2 بلس او 3 بلس وتيجي علي المستشفي وتديه جرعة انسولين قبلها.
.. عشان كدا بنبه عليهم طالما جاي المستشفي والاسيتون 2 فااكثر ماتديش انسولين شربه مياه فقط في السكة ولو بيرجع اديه حقنة زوفران للترجيع وبعد ربع ساعة ابدا شربه مياه طول الطريق لحد مايوصلنا ونبدا المحاليل مع الانسولين حسب نسبة الاسيتون ورقم السكر ونتيجة تحليل غازات الدم واملاحه.
.. طبعا الاعمار بيدي الله بس هنا اللي ماحصلش ان ماحدش شك في اسيتون علي سكر طبيعي وماطلبش تحليل اسيتون.
.. طبعا بعد فترة الاسيتون دا بااعتباره حمض في النهاية بيعمل حموضة بالدم ودي خطورتها انها بتسبب جفاف شديد وسرعة تنفس وهي دي بداية المشاكل.
.. الطفل روح البيت عادي وبدا علاجه بمضادات حيوية قوية.
.. بس بدات الحالة تتدهور النفس يعلي وملامح الجفاف بدات تبان عليه بشدة والترجيع بيزيد.
... الام خدته وجرت علي مستشفي كبيرة برضه بس هنا اتصرفوا صح.. عملوا سكر واسيتون وغازات دم واملاحه.
.. السكر بقي النقيض HI ودا متوقع بعد فترة مع اي عدوي او التهاب بتطلع هرمونات زي الجلوكاجون والادرينالين والكورتيزون اللي بتعاكس عمل الانسولين وبتزود السكر حتي لو الطفل ما اكلش وطبعا الاسيتون كان 3 بلس واكتر و الحموضة PH كان 6.8 والبيكارب HCO3 منخفض جدا.
.. الواضح انه كان خلاص الوضع بدا يخرج عن السيطرة ووظائف الكلي بدات تتاثر.. المرحلة اللي بترعبني وبسعي جاهدا امنع اي طفل بغيبوبة كيتونية يوصلها multiorgan system failure او فشل متتالي في اجهزة الجسم.
.. زمايلي اطباء رعاية الاطفال عارفينها وبيخافوا منها مرحلة انك بتشوف اجهزة الجسم بتتضرب واحد ورا الثاني وانت واقف تتفرج دورك كله supportive يعني علاج تحفظي مابتبقاش عارف تعمل حاجة للطفل.. الملاك قلبه توقف عن النبض مرتين وعملوا انعاش للقلب CPR ورد ولكن المرة الثالثة كان اسلم الملاك الروح لبارئها.
.. دايما بقول لزمايلي اللي اصغر مني انت في الغيبوبة الكيتونية او اي حالة رعاية اطفال بتلعب ضد الزمن ايوه زي سباق الدراجات اللي بيسموه عكس عقارب الساعة.
.. عشان كدا اللي يعرفني هيلاقيني في اي حالة غيبوبة كيتونية صعبة بفرك في اول ساعتين او ثلاثة هم دول الاهم انا بلعب ضد الحموضة الشديدة المقاومة للانسولين.. ضد ارتشاح المخ brain edema.. ضد اختلال املاح الدم صوديوم وبوتاسيوم وقبلهم كلهم ضد الجفاف الشديد.
.. علاج حالات ال euglycemic ketoacidosis هو عكس بروتوكول العلاج العادي يعني بتبدا بجلوكوَز ملحي مش محلول ملح وتحوله لمحلول ملحي لو السكر ارتفع عن 250 مجم او اكتر من 100 مجم بالساعة.
.. وبتبدا باانسولين علي جرعة 0.05 وحدة لكل كيلو بالساعة تزيد ل 0.1 وحدة لكل كيلو في الساعة لو السكر زاد عن 250 مجم او اكتر من 100 مجم بالساعة ودا حتي اختفاء الاسيتون.
.. الحالات دي بتغدي بس مشكلتها في تشخيصها.. بنسميه في الطب diagnosis of suspicion او ألتشخيص بالشكوك ودا اصعب انواع التشخيص.. لازم تتوقع حدوث الاسيتون علي سكر عادي وامكانية حدوث حموضة كمان.
.. كل اللي بيقرا المقال يقرا الفاتحة علي روحه الطاهرة ويدعوا لوالدته بالصبر وانا نفذت طلبها ونشرت في عز ازمتها حريصة انها تساعد عشان مافيش قلب ام يتوجع تاني علي طفلها
DR.AMR OMAR
