يوميات طبيب تكليف

Diaa Hamdi

Moderator
طاقم الإدارة
Team Member
ست 60 سنة جاية بالشكوى المعتادة (عاوزه قطره لعنيها )عنيها حمرا بقالها 4 أيام. .ده كل اللي بتشتكي منه بس ..بقيس لها الضغط لقيته
260 ع 120 وده اعلي رقم قابلني في حياتي طب يا حجه مفيش أي حاجة تعباكي؟ مفيش صداع حتي ؟ولا أي حاجة (عشان كده بيسموه القاتل الصامت )..طب عينك دي فيها زغلله مثلا ؟تقولك لأ هي حمرا بس الجميل بقي أنها كانت صايمة كمان ونسيت تاخد دوا الضغط ..اديتها قرص كابوتين وقلت لها تروح تاخد علاجها وتطلع ع الطواريء ومتروحش غير لما ضغطها يتظبط وتعمل فحص قاع عين ع الأقل
الرسالة هنا ..في ناس بتضايق من الناس اللى بتيجي الطواريء كل شوية تقيس الضغط. .بقولك اتضايق من أي حاجة الا قياس الضغط بالعكس أنت اللى تدور علي الناس وتجيبهم تقيس لهم الضغط
تاني حاجة..مفيش مريض زي التاني وكل مريض هو كنترول علي نفسه بس
...
الحالة اللي بعدها. .عندك ضغط يا حجه ؟ اه ..طب بتاخدي الدوا بتاع الوحدة (أصل الدوا أتغير وبعد ما كان بيتا بلوكر جابوا لنا كابتوبريل. .وده طبعا استهتار. .البيتا بلوكر مينفعش تقف فجأة ممكن العيان يدخل في mi والواقع أن الناس بتوع الوحدة غالبا ميقدروش يجيبوا دوا من بره ) المهم قالت لي لأ بشتري من بره أصلي اتظبطت عليه إيه يعني 100 ج كل شهر ..قلت لها كويس. .أقيس الضغط الاقيه 200 ..قلت لها يا حجه الضغط بنعرف انه مظبوط أو لأ مش بوجود الصداع أو عدمه إنما بالقياس ..إننا نقيسه فنلاقيه مظبوط
الرسالة هنا ..ياما ناس بتدفع فلوس ع أدوية الضغط والسكر وفي الحقيقة هما مش controlled ولا كأنهم بياخدوا دوا أصلا
...

مريضة سكر 50 سنة جاية بتشتكي من
facial pain
وانا بفحصها قلت انا مش قلقان تطلع diabetic neuropathy
ولا قلقان تطلع trigeminal neuralgia
ولا حتي قلقان تطلع herps وال eruption لسه محصلش
إنما أخاف تطلع temporal arteritis. .
.. الهدف يبعت رسالة علي خطورة ال temporal arteritis. .لأن المرض ده لو مش في دماغك مش هتشخصه. .ولو متشخصش المريض ممكن يتعمي. .المرض ده محتاج high index of suspicions ومفيش حتي investigation هتعملها بمجرد ما تشك فيه لازم تبدأ له العلاج (سترويد )حتي لو عاوز تاخد عينه يبقي بعد ما تبدأ العلاج ..وإلا هتقول للعيان مبروك انا شخصتك بس بعد ما أتعميت
...



٦٢٦٢
 



قد يهمك ايضاً !

Diaa Hamdi

Moderator
طاقم الإدارة
Team Member
ست 54 سنة عندها سكر بقالها 3 شهور بتشتكي من tingling و numbness في أيديها ورجليها ..وبتوصف أنها حاسه أنها لابسه جاونتي في ايديها وشراب في رجليها وده فعلا اللي أكده الفحص ..فيه rash في رجليها اتضح بالفحص انه vasculitis ... السؤال هنا إيه اللي المفروض تعمله لما تلاقي vasculitis ؟
هو أول حاجة تبقي عارف أنه vasculitis ودي هتيجي لما تشوفه كتير لو حتي تشوف صور له
تاني حاجة .لازم تشوف ال circulation عاملة إيه؟
وبالفعل اتضح أن في صابع في رجليها وصابع في أيديها بدأوا يتأثروا. .لونهم أتغير وcold عن غيرهم .. ده معناه إنها محتاجه aggressive treatment
معلومة أن ال vasculitis بيعمل ischemia ممكن تبقي موجودة عند ناس كتير. . .لازم أنك ترتب دماغك. .أنت بدور علي حاجة متوقعها. .لو أنت مش حاضر في مخك حتة الاسكيما وبصيت علي صوابعها مكنتش هتلاحظ حاجة إيه يعني الصابع الصغير لونه باهت شوية ؟ لكن لما تكون أنت بتبص أصلا علشان تشوفها فعمرها ما هتعدي منك
...
تالت نقطة أنك تدور على السبب
انك تدور علي hepatitis B وأنه من الحجات المشهورة اللى بتعمل المنظر ده
...
 

Diaa Hamdi

Moderator
طاقم الإدارة
Team Member
البوست ده هيبقي موجه للناس كلها مش للأطباء والصيادلة بس ..
الأول هقول المعلومة وبعدين نشرحها للناس كلها
أهم 3 أسباب تعمل Renal shut down في مريض chronic kidney disease هي
أول سبب pre Renal أنه مبيشربش مية كويس
تاني سبب Drugs أنه خد دوا غالبا مسكن
تالت سبب infection ..عدوى في أي مكان
.....
الشرح وده شرح الناس كلها هتفهمه إن شاء الله
في ناس كتير عندهم مشكلة مزمنة في الكلي ..لكنه ماشي بالستر. .الكلية بتاعته ماشية بالعافية مثلا وظايف الكلي بتاعته 2 وبقاله سنين والحمد لله لسه مغسلش وبالمناسبة ممكن يكون عارف أن عنده مشكلة في الكلي وممكن ميبقاش عارف
وأكتر ناس تتوقع إن الكلي بتاعتهم fragile وكأنها قابله للكسر من أقل حاجة هما الناس الكبيرة في السن ومرضى السكر والضغط ..دول مش محتاجين أي تحميل عليهم..وكل دوا يتكتب لهم لازم يبقي بحكمة
الناس دي ممكن تبقي ماشية كويسه وفجأة يجيلهم فشل كلوي حاد أو Renal shut down. .
وكأن الكلي حد طفاها زى ما بتعمل للكمبيوتر shut down ..فيه منهم اللي ربنا بيكرمه وبيغسل مرتين تلاته ويرجع تانى وفيه اللى مبيرجعش ويفضل يغسل طول عمره
طيب إيه الأسباب دي عشان نوعي الناس تتجنبها؟
أول سبب ..أنه مبيشربش مية كويس
الكلي شبه الساقية. ..من غير مية عمرها ما هتدور
طيب ليه العيان مبيشربش مية ؟
أول حاجة أن في السن الكبير إحساس العطش بيقل فهو أصلا مش عطشان فبالتالي مش هيشرب غير لو أنت قلت له وأكدت عليه
تاني سبب ..أنه ممكن يكون قاعد في السرير ..ومش عاوز كل شوية يدخل الحمام فميشربش
تاني سبب يعمل Renal shut down هو
المسكنات وبعض الأدوية ودى أهم نقطة هأكد عليه
كان فيه 3 حالات فشل كلوي اتنين منهم في الرعاية وسبحان الله التلاته بياخدوا (باي الكوفان )اللي هو بيتقص زي الملبس في الصيدليات وبيطلع بدل الفكة
طبعا مش المقصود (باي الكوفان )بعينه كل المسكنات زي بعض سواء بروفين كيتوفان فولتارين كل ما هو مسكن أيا كان اسمه بنحذر منه
تخيل واحد ماشي بالستر وعايش حياته جاله وجع ونشر في مفاصله وركبته اللي هي عند الناس كلها الكبيرة في السن راح لدكتور عظام اداله مسكن دخل في فشل كلوي (قصة قصيرة مشهورة ومتكررة للأسف )
ممكن يبقي فيه اتنين دكاتره واحد حكيم وبيتعامل بضمير والتاني ميعرفش أو متعلمش والمريض يروح عند ده أو ده ويخف وبالعكس ممكن يقول ع التاني ده انه ارتاح علي علاجه أكتر ..
لكن بالتأكيد النتايج ع المدي البعيد بتفرق
دكتور العظام اللي بيكتب تلت أنواع مسكن وبجرعات كبيرة علشان العيان ياخد الدوا من هنا ميحسش بحاجة ويتقال عليه دكتور شاطر بقوله أنزل أي وحدة غسيل كلي وشوف الناس بتغسل ليه
هتلاقي كتير من مرضاك أو مرضي زمايلك هناك
..
الصيدلي اللي بيطلع حباية صداع لأي عيان من غير ما يقوم بدوره كدكتور ويعمل Patient counseling وياخد هستوري ويتكلم مع المريض ويفهمه ..والأكتر من كده اللي سايب صيدليته للمساعد. .متخيل أن ناس دخلت الرعاية من كم حباية مسكن اتصرفوا من صيدليتك من غير ما تديهم اهتمام ؟
الجراح اللي هيزرع كلي ..هيعمل كم عملية في حياته كلها ؟10 ولا 100
دكتور الباطنة ولا الصيدلي ولا دكتور التكليف الغلبان اللي بيتكلموا مع العيانين وينصحوهم بشرب المية والبعد عن المسكنات في كل مناسبة دول هيمنعوا كم واحد يجيله فشل كلوي ؟الاف أو عشرات الآلاف. ..أه هو مفيش حد هيطلعهم ع التلفزيون ويكرمهم زى الجراح اللي زرع كلي
لكن يكفيهم إنهم يعرفوا أن اللي بيعملوه أعظم بكتير من زراعة الكلي (اللي هي عظيمة بردو )
..
جات لي النهاردة الوحدة ست كبيرة عندها سكر ..بتقولي أما خدت الحباية الصفرا اللي عاملة زي الفاصوليا دي تعبت لي معدتي ..قلت لها كويس دي نعمة من ربنا علشان تبعدي عنها ..وقعدت فهمتها. .انت كدكتور تكليف غلبان متستقلش اللي بتعمله
أو أنت كصيدلي بتراعي ربنا متستقلش اللي بتعمله
معلش يعني هو ليه لازم اللي يقف في صيدلية يبقي دكتور ؟ما أي حد يقف يبيع وخلاص ؟لأن ببساطة الأدوية دي سموم ولازم اللي يصرفها يبقي حكيم وعارف إن نفعها في الحالة دي أكتر من ضررها. .يمكن الصيادلة أكتر ناس ممكن تقوم بدور التوعية لأنهم بيشوفوا شريحة كبيرة جدا من الناس
يمكن الصيدلي أكتر واحد عارف ال Side effects بتاعت الأدوية ..بس يمكن يكون عارفها نظري ..عشان كده بقولهم دايما حاولوا تنزلوا المستشفيات وتحضروا معانا فى المرور وتشوفوا بعنيكم الكلام اللي قرأتوه في الكتب وان الأدوية ممكن تعمل syndromes كاملة
الناس اللي بتدي كورسات وتعلم ياريت تنشر المعلومات دي
 

Diaa Hamdi

Moderator
طاقم الإدارة
Team Member
(التكليف في رغيف 😃)
ناس سألتني تستعد أزاي للتكليف وايه الحالات اللي هيتعاملوا معاها
أول قاعدة لازم نحفظها (Do no harm )
أهم حاجة متضرش عيان ..لو مش قادر تنفعه مش مشكلة بكره تتعلم وتقدر المهم متضروش
أي حاجة مش عارفها حولها ومعاك حتي دفتر تحويل في الوحدة لو حابب تحولها رسمي
...
نيجي للحالات
أكتر حالات هتشوفها هي حالات الأطفال
أشهر ال Symptom اللي هتجيلك هي بالترتيب
اللوز ثم اللوز ثم اللوز ثم ما شئت 😃
عندك في الوحدة أموكسيل شراب وبارستامول شراب ..مفيش حاجة اسمها حقن ..بقولك بعد ما عالجت مئات الأطفال من اللوز أن 99 في المية من الأطفال لإما مش محتاجة مضاد أصلا لإما بتستجيب للشراب. .ونسبة بسيطة لما تلاقي bad general conditions. .دول حولتهم وممكن حتي يتحجزوا. .هتتحاسب عن الحقن اللي بتكتبها للأطفال بدون داعي
هتلاقي عندك في الوحدة ال guidlines المصري فيه ال IMCI ..هيجيب لك كل ال Symptom في الأطفال تتعامل معاها ازاى ككلينكال وايه ال criteria اللي تدي فيها مضاد حيوي وامتي تعمل Refer ..طبعا مع اللوز هتذاكر البرد والكحة والرشح من الأنف ..ده كله حاجة واحدة غالبا 😃
تاني حاجة هتشوفها اطفال وكبار هي الديدان
عندك في الوحدة fluver حبوب وشراب
ولو الشراب مش موجود بطلع الحبوب ياخد الحباية ويكسرها ويدوبها في كوباية مية . .الجرعة المشهورة ..حباية واحدة الآن وتكرر بعد أسبوعين ..أو 5 سم من الشراب الآن وتكرر بعد أسبوعين مع التنبيه علي النظافة وقص الأظافر ..طبعا فيه تفاصيل ابحث عنها واقرأ
تالت Symptom. .الإسهال ..عندك في الوحدة في محلول جفاف (اهم دوا )وفيه زنك شراب
راجع ال imci ..مثلا اسهال فيه دم ..ده هتحوله علي طول وهكذا
وعندك في الوحدة فلاجيل شراب بردو
..
بعد كده النسا أغلب الشكاوي UTI أو infection عموما وساعات لوز ..بص في بوق أي عيان سخن
بعد كده الستات الكبيرة ...هتلاقي ست كل شهر جايه تاخد دوا السكر والضغط ليها هي وجوزها وعاوزه قطرة لعنيها (غالبا dry eye )وعاوزه حاجة للحموضة (ranitidine ) وعاوزه مسكن لرجليها. (بلاش تديها مسكن واديها vitamin b 12 حباية تحت اللسان واقنعها تنزل شوية في الوزن وتعمل كمادات دافية علي ركبتها اللي بتوجعها وتدهن زيت زيتون ولو محتاجه اوى يبقي مرهم مسكن )
لازم تقيس لها الضغط كل مرة ..وتخليها تعمل تحليل سكر كل فترة لأن نادر أما شوفت عيان ضغط وسكر متظبط علي أدوية الوحدة لوحدها
وابقي خليها تجيب لك جوزها تشوفه بردو في مرة أو لو تعبان أوي ابقي روح له أنت مرة
عندك للعين قطرة مضاد حيوي وقطرة للحساسية
ذاكر ال Red eye وال dry eye كويس
فيه حالات جلدية كتير في الوحدة حاول تنزل عيادة الجلدية شوية عموما المراهم اللي عندك
هتلاقي أسماء غريبه بس انا متفق مع الصيدلي بكتب الاسم السهل وهوه يطلع اللي عنده
مرهم مسكن (فولتارين ) مرهم مضاد حيوي (تتراسيكيلين )مرهم مرطب (بانثينول )مرهم للتسلخات (كيناكومب )مرهم فطريات (ديرماتين )
هتشوف حالات كتير جدري في الأطفال فحاول تقرأ عنه كويس
عندك للكبار
مضاد حيوي (فلومكس ) ومسكن (بارسيتامول )وبروفين. .وللكحة. .ديكسترومثروفان شراب وسالبيتامول شراب (لهم أسماء غريبه بس أنا بكتبهم كده للصيدلي )وفيه مذيب للبلغم. .بلاش أدوية كحة في الأطفال (هتعاني مع الأمهات بس احتسب )بس خد بالك الكحة دي خصوصا لو dry ممكن تكون asthma
أما تروح هتلاقي الناس متعودة أن الوحدة دي سوبر ماركت هو جاي يقطع تذكرة وعاوز ياخد عليها أدوية ..كل تذكرة الحد الأقصى ليها 3 أدوية ..هو جاي وعاوز 3 أدوية 😃حتي لو معندوش حاجة ..
مثلا ممكن تكشف ويصادف مثلا أن عنده لوز بس الأدوية خلصانه مفيش حتي دوا سخونة هنا هتلاقي الأم بتألف شكوي جديدة فأنت علشان تختصر ع نفسك وعليها قولها طيب ياستي ده علاج اللوز من بره وده مقويات من هنا وتكتب لها فيروفيت شراب 😃هتقولك طب مرهم للتسلخات متزعلهاش بردو😃
عموما في المواقف دي متكتبش غير فيتامين أو مرهم ..حاجة تفيده من غير Side effect
لكن لو هي مصممه مثلا تاخد مضاد حيوي مع أن الحالة مش مستاهله. .لأ طبعا لما تقف على رجليها 😃 وكذلك المسكنات أمسك ايدك فيها أوي
مع الحاجة اللي هتضره خليك حازم ..وفي نفس الوقت قوله طب هديك حاجة احسن من المسكن والمضاد
نادر أما يجيلك رجالة الوحدة ..وغالبا هتلاقي عندهم حاجة ..أغلب الرجالة اللي جولي الوحدة خدتهم للدكتور الألفي وطلع عندهم مشاكل كبيرة آخرهم واحد طلع عنده Pulmonary fibrosis لأنه ساكن وشغال في منطقة فيها مصانع شبة
..
دي أهم المواضيع والأدوية كرؤس أقلام. .أمسك كل Symptom واقرأ ال guidlines بتاعها
وامسك كل دوا وافتح medscape اقرأ التفاصيل بتاعته خصوصا ال Contraindications
الناس الكبيرة في السن دي ناس fragile عاوزه fine hand تتعامل معاها زي ما د الألفي علمنا
ممكن حبايتين مسكن يدخلوه في
Renal shut down
ف Do No harm
 

Diaa Hamdi

Moderator
طاقم الإدارة
Team Member
(وبضدها تتميز الأشياء )
دايما تنصح الناس اللي لسه جايه جديد أنها تصبر علي نفسها وإن أكتر ناس بتستفيد من المرور هو اللي بيشوف الحالة النهاردة ويجي المرة الجاية يشوف وصلت لأيه..لكن اللي بيجي ياخد لقطة بس من المشهد مبتوصلوش الرسالة كاملة
الحالة الأولى . .ست 60 سنة. .بتشتكي من زيادة ال abdominal gyrs. .بالفحص كان فيه movable mass زي cyst ومعاها سونار قديم بيقول انه cyst. ..عندها dvt ..و glazed tongue
وgeneral conditions بتاعتها مش حلوة
بقالها سنة بتلف. .ناس اديتها قبل كده علاج واتحسنت عليه .. يا تري إيه العلاج اللي هي اتحسنت عليه ؟هقولك دلوقتي
المهم حد شك أن ال cyst ده
hydatid disease
وممشيها علي Alzental بقالها 6 شهور!
النائب قال عمري ما هقبل ده hydatid disease كده simple. .وقال ده مش هيداتي ..أما يجي هيداتي هوريهلكم
وقال السن مع ال bad general conditions مع ال DVT ..لازم يخليني أفكر في malignancy ..وقال لنا ال hypercoaguable state من الحجات المميزة لل malignancy. .وأن كان بعض صورها مشهورة أكترمعاه زي ما قلت في المنظومة
تكرر التخثر. ..بموضع مشتهر
أو مرة تخثر. .بموضع ما أشتهر
فلتكشفن عن ورم ..وابحث تخثر الدم
فهنا ال DVT وإن كان مش الصورة المشهورة أوي لكن لأن فيه Clinician ..فهو بيجمع الصورة ..ومن الحجات اللي كانت موجودة ..إن الست كان عندها glazed tongue. . ولما تلاقي glazed tongue فكر في GIT malignancy
المهم الست جت المرة دي كانت أول حالة تتقدم ..عملت سونار ع الحوض ..وطلع بالفعل tumor في ال ovary وتقريبا منتشر .. ..
المهم وأنا ببص في الكشكول في محاضرة الاسبوع اللي فات لقيت كلمة لفتت انتباهي. .اه أنا كنت فاكر إن النائب أكد جدا علي استبعاد ال cancer ..بس لما قرأت الكلام عرفت يعني إيه
Clinical sense و Expert
النائب قال بالنص ..هنعيد السونار تاني ..وهنعمل CT ..ولو مساعدناش هنعمل MRI ولو مسعدناش ممكن نوصل ل EXploration!
هو ده العلم وهو ده ال Sense..وكأن الحالة طالعه متشخصه. .فاضل بس نثبتها مش أكتر !
...
الحالة التانية...اللي دخلت بعدها دي ست في الأربعينات ..كانت محجوزه في الرعاية الاسبوع اللي فات ب dysnea ..وقت ما دخلت اللي حجزها بلغني انه شاكك في Pulmonary embolismفالدكتور قال ده Differential محترم محدش يقدر يعترض عليه خصوصا أنه مشفش الحالة ..المهم لما شافها في الرعاية الاسبوع اللي فات ..اتنين من الدكاترة الكبار الملازمين للدكتور ميلوا عليه وقالوا له دي psycogenic ؟فشاورهم يعني عدوها 😃
الست دي بقالها سنة في موضوع ال dysnea. .طبعا اللي حجزها عمل ct angio وطلع normal. .هي جت الاسبوع اللي فات كانت خلاص طلعت من الرعاية ..الدكتورقال إن دي psycogenic dysnea. ..وإنها متحسنتش غير لما خدت antidepressant
وبعد ما عمل لها reassurance قالها يلا يا ستي روحي ومعدتيش تروحي لدكاترة تاني 😃واللي عندك ده سببه نفسي. .الجميل الست كانت متصالحه مع نفسها ..وراحت جايه مأكده الكلام ..إن ضيق النفس اللي كان بيجيلها ظهر من سنة ..لما سمعت من الدكاترة أن أبوها احتمال يكون عنده سرطان ..جت لها ال dysnea دي بعدها ب 3 أيام بالظبط
الرسالة هنا..في الحالتين مع بعض. .رسالة واضحة جدا بتقول إن الموضوع مش اني اطلب Investigation كتير ..ولا إني مطلبش خالص وأقول دي سيكك...
هي وضع كل شيء في موضعه
بالنسبة للدكتور طلب إشاعة بدون داعي شيء منافي للحكمة بالظبط زي اللي ميطلبش Investigation في حالة محتاجة ده إفراط وده تفريط وكلاهما مذموم
 

Diaa Hamdi

Moderator
طاقم الإدارة
Team Member
عيان تقريبا 50 سنة. .كان عنده كسر في دراعه أو عامل عملية في دراعه (قعد فترة كبيرة ميحركهوش ).جه المرور من كم شهر بحاجة زي اللي في الصورة دي (دي أقرب صورة لقيتها لحالته )
أيده وارمه جدا وبمجرد ما تلمسها فيه ألم شديد
52297959_2296336634024669_2018099364525768704_n.jpg

ومش قادر يحركها
وكان تشخيصه
complex regional pain syndrome
والحمد لله أتحسن جدا وخرج ورجع لحياته جه الاسبوع اللي فات والأعراض رجعت تانى
بالرغم إن ده حاجة تزعل بس لعله خير إن الناس اللي بتيجي من آخر الدنيا علشان تتعلم أنها تشوفه لانها حالة مش هتشوفها كتير
أهم نقط ممكن نستفدها من الحالة ..
على قد ما نقدر أي حد يعمل عملية أو أي حد ملازم الفراش عموما لازم يتحرك أو احنا نحركه ونتبع قانون النسبيةبيقول ..يعني فيه واحد نقبل منه أنه يمشي خطوة وواحد نقبل منه أنه يقوم ويقعد في مكانه وواحد نقبل منه أنه يضم أيده ويفردها كل واحد حسب حالته
تاني نقطة تشخيص المرض ده بيبقي
Diagnosis of exclusion
لازم نتأكد الأول إن مفيش سبب تاني
..
تالت نقطة. . التشخيص بالنسبة لنا واضح ..المشكلة كلها هتبقي في العلاج
لما تقرأ عن المرض ..هتعرف إننا تقريبا منعرفش عنه حاجة وهتلاقي أدوية كتير جدا كلها معتمدة علي آل Expert opinion أو دراسات صغيرة
بس خلاصة العلاج حسب ما فهمته هتبقي كالتالي
Pain management up to opioid
Physiotherapy as soon as possible steroids خصوصا لو فيه edema
Psychotherapy + antidepressant
مش بس علشان المرض ده في حد ذاته بيدخل المريض في Depression. .زي ما الدكتور بيقول إيده أصبحت عبء عليه ..يمكن اللي له إيد واحدة مرتاح عنه ..لكن ده إيد مريضة بيتألم منها والأيد التانية طول الوقت شايلاها
السبب التاني أعتقد إن جايز في سبب المرض يكون فيه عامل نفسي من البداية
آخر حاجة المرض ده من أصعب الأمراض في علاجها لدرجة أن في ناس بتعمل amputation من شدة الألم وحتي بعد ما يعملوه مش كلهم الألم بيختفي !
أجل الكلام عن العلاج لأن زي ما شوفنا مفيش guidlines واضحة والموضوع هيعتمد أساسا علي آل Expert opinion وجايز حتي يكون أدي حجات مش مكتوبه في الكتب وحتي الموجود في الكتب (زي الستيرويد )ناس كتير مش هتستوعبه دلوقتي خصوصا إن كل مرة ناس جديدة بتيجي..بس أيا كان المريض ده خد إيه فهو شيء عظيم يأكد لك إن الطب فيه حاجة اسمها
Expert opinion
 

Diaa Hamdi

Moderator
طاقم الإدارة
Team Member
كتبت بوست عن (الحكمة الطبية )وأنها إنما تؤخذ عن الأساتذة أهل العلم والحكمة وتتوارث عبر الأجيال ..وأن اللي بياخد العلم من الكتب من غير ما يكون له أستاذ يعلمه العلم والحكمة هيبقي (أضل من توما الحكيم )..النهاردة وتأكيدا للكلام قابلني مقال في ال JACC ضرب مثل لذيذ جدا ..بيقولك لو عيانه 63 سنة ضغطها 148 ع 86 ..جت لك العيادة مش ماشية علي أي دوا ..فأنت راجل بتحب تمشي ع العلم ففتحت ال guidlines علشان تعرف هتعمل إيه. .لقيت دكاترة القلب الأمريكان بيقولوا لك دي محتاجة تبدأ معاها بدواء واحد one drug...ودكاتره القلب في أوربا بيقولوا لك لأ انت تبدأ معاها بدوايين two drugs ..أما دكاترة طب الأسرة الأمريكان فيقولوا لك يا بني سيبها في حالها ومتديهاش أدوية خالص 😃 والعجيب يا مؤمن أن التلت guidlines مبنين ع دليل واحد ..بس كل واحد طلع توصيات بناءا على خبرته وحكمته. .
( the 3 guideline sets on the Lewington et al. meta-analysis, which explored the relationship between usual blood pressure and mortality from stroke, coronary artery disease)
دي عاملة بالظبط لما أقولك عندنا في مسألة فقهية 3 آراء للعلماء او 3 مذاهب ..مع أن الدليل أو الحديث اللي التلاته بيستشهدوا بيه واحد .لأن الموضوع مش صحة الدليل بس ..إنما فهم الدليل وتطبيقه هو العلم والفقه والطب والحكمة
..
في نفس المقال بيقول
Practicing physicians commonly trust guidelines to be the epitome of evidence-based medicine. However, of a total of 2,711 recommendations in the ACC/AHA clinical practice guidelines in 2009, only a median of 11% were classified as Level of Evidence A, whereas a median of 48% were Level of Evidence C (8). This would indicate that guidelines still are predominantly based on lower levels of evidence or expert opinion. Clearly, guideline recommendations are not only an evaluation and interpretation of evidence in question, but also a judgment weighted by personal, regulatory, and organizational preferences that can vary from physician to physician within a country and across geographical regions
وده بيأكد كلامي المرة اللي فاتت إن ال Expert opinion وان كان هو الدليل الأضعف. .لكنه الغالبية العظمى من (الحكمة )أو ال recommendation ..وأن حتي ال guidlines اللي كتبها هما ال Expert وحطوا فيها آرائهم. .وفي آخر المقال بيقولك ..إن ال guidlines بقيت كتير ولسه هتكتر وفي نفس الوقت مفيش Evidence قوية تتناسب مع ال guidlines دي ..عشان كده هتلاقي اختلافات كتير وكل مدي الاختلافات هتكتر ..وفي الحالة دي لازم كل Clinician يبقي له عقله وحكمته وذكاؤه وميستناش حد يقوله كل حاجة..أو بمعني أصح لازم تتعلم العقل والحكمة ..عشان تقدر تختار من الكتب وال guidlines اللي يناسب مريضك
طب هتتعلم الحكمة منين لو مكنتش هتاخدها من الأساتذة ؟
مش عاوز أقولك أن ساعات حتي الكتب وال guidlines مش هتسعفك. .وهتبقي مخير بين حاجتين ..أنك تجتهد (بعلمك وحكمتك وخبرتك ك Expert )وتنقذ مريضك. .أو أنك تسيبه يموت بس تبقي ماشي ع ال guidlines 😃..وشوفت مع الأساتذة حالات زي كده وكانوا بيجتهدوا. كانوا بيقولوا معنديش دليل ع اللي عملته وان ده هيبقي Expert opinion
غير كده المريض هيموت. .وتمر الأيام ويثبت أن قرارهم فعلا كان صح ..وأنهم انقذوا العيان

..
دلوقتي لو سألتك بقى الحالة اللي فوق دى هتديها دوا ولا اتنين ولا مش هتديها خالص هتعمل إيه؟ 😃
 
أعلى