مفهوم التكليف و هيكل وزارة الصحة

MaHmOuD MyStErO

Administrator
طاقم الإدارة
Team Member
تكليف الأطباء هو التعيين الإلزامي (الإجباري ) لكل خريجي كليات الطب من الجامعات المصرية
يعنى أول ما تتخرج فى كلية طب مصرية ، الدولة ملزمة بتعيينك بنص قانون التكليف يعنى لازم توفرلك وظيفة طبيب بشرى ..

مفهوم تكليف الأطباء

التكليف فى الأصل هو تعيين الطبيب البشرى حديث التخرج فى قطاع الرعاية الأولية التابع لوزارة الصحه لممارسة دور هو فى الأغلب دور تابع للقطاع الوقائى و يمارس أيضاً دوره كطبيب بشرى "ممارس عام" فى حدود الإمكانيات المتاحه فى الوحدات الصحيه ..

التكليف بــ نص قانون التكليف مدته سنتين كاملين
يعنى خلال أول سنتين من تاريخ استلامكم للتكليف أنتم أطباء مكلفين ..
لكن كونك تقضى السنتين كاملين فى قطاع الرعاية الاولية اللى هو بيشمل الوحدات الصحيه أو مكاتب الصحه أو الحجر الصحى أو لا ، دا بيخضع لظروف و قواعد تكليفك ، يعنى ممكن تقضى سنة و نص ، ممكن تقضى سنة واحدة ، ممكن تقضى 11 شهر ..

قبل كدا اتلغى تكليف المهندسين ، و تكليف المدرسين لحد ما دلوقت أصبح التكليف الوحيد اللى لازال على قيد الحياة ، هو تكليف الهيئات أعضاء المهن الطبيه ،اللى هم الأطباء البشريين و الأسنان و الصيادلة و التمريض و الفنيين الصحيين ..

التكليف هو بداية مستقبلك ، هو ضربة البداية و أهم خطوة فى مستقبلك ..

إن أخدت الخطوة دى أصلاً و كمان إبتديتها صح ، مستقبلك كله هايتبنى على الطريق الصحيح لأن مستقبلك كله هايتبنى على الخطوة دى ..
التكليف هو طريقك للنيابة فى تخصصك ، و هو طريقك للترقيه فى مستشفى أياً كانت فى وزارة الصحه ..
ماتضحوش بالبداية ، و ابدؤوا صح عشان ماتندموش ..

##طيب انت شخص مستغنى عن التعيين الحكومى و مش عايز تشتغل فى وزارة الصحه ، تعمل إيه فى حوار التعيين الإجبارى اللى بيتطبق بقوة القانون ده؟
سهله جدا ، وقت ما تنزل حركة التكليف و يتفتح تسجيل الرغبات هاتختار إلغاء التكليف
و بعد كدا تاخد شهاداتك و تروح تكمل إجراءات إلغاء التكليف فى إدارة التكليف فى القاهرة و بعد كدا بتاخد شهادة طبيب حر من النقابة العامه للأطباء.


فيه بقا للتكليف ده أنواع و هى كالآتى:
  1. تكليف جهات أساسية
  2. تكليف جهات خارجية
1) تكليف الجهات الأساسية ده هو التكليف بأى جهه تابعه لوزارة الصحه ، يعنى تكليفك فى وزارة الصحه نفسها و دا بيبقى فى القطاع الوقائى بالوزارة ..
و دا بتقدموله على الموقع الخاص بتنسيق وزارة الصحه اللى فى اللينك ده
الحكومة الإلكترونية - خدمة تنسيق وزارة الصحة

بتسجلوا الرغبات عادى خالص و بعد كدا تظهر النتيجة و على أساسها تستلموا بعد صدور القرار الوزارى الخاص بتكليفكم ..

تكليف الجهات الأساسية بيبقى تكليف فى مديريات الشئون الصحيه و الإدارات التابعه لها
و دا نوعين ،
*تكليف مناطق نائية و المناطق دى (كل ادارات جنوب سيناء ، كل ادارات محافظة مرسى مطروح ، كل ادارات محافظة البحر الاحمر ، كل ادارات محافظة أسوان ، كل ادارات محافظة الوادى الجديد ، كل ادارات محافظة شمال سيناء ، ادارة القنطرة شرق بمحافظة الاسماعيلية ، ادارة الواحات البحرية بمحافظة الجيزة ، ادارة غرب النوبارية بمحافظة البحيرة ، ادارة يوسف الصديق بمحافظة الفيوم ، كل ادارات محافظة الأقصر ، كل ادارات محافظة قنا ، كل ادارات محافظة سوهاج )

**تكليف مناطق مركزية ، هو التكليف بأى منطقة غير المناطق اللى ذكرتها ضمن المناطق النائية

التكليف بالمناطق النائية له مميزات و عيوب ، بعض المناطق لها مميزات ادارية فقط و بعضها له مميزات مالية و ادارية
التكليف المركزى و النائى ( مميزات و عيوب )

2) تكليف الجهات الخارجية ، دا اللى هو تكليف فى أى جهه خاصة أو لا تخضع لوزارة الصحه زى التكليف بوزارة الدفاع بصفة مدنية و التكليف بوزارة الداخلية بصفة مدنية و التكليف بهيئة السكة الحديد و الانتاج الحربى و الطيران المدنى و مستشفيات الطلبة التابعه للجامعات و المدن الجامعيه و الوحدات العلاجية التابعه لوزارة البحث العلمى ..
و دى فيها بعض الرغبات بتنزل مع تكليف الجهات الأساسية و بتسجلوها معاها عادى
و بعضها زى الجيش و الشرطة و السكة الحديد و غيرهم بيكون التقديم ورقي و مباشر فى الجهه المسؤولة..
اعرف اكتر عن : تكليف الجهات الخارجية ( تكليف الجيش و الشرطة و الادارات الطبية )




هيكل وزارة الصحة

طب يعنى إيه قطاع وقائي اللى بأقولكم عليه ده ؟
وزارة الصحة مكونه من عدة إدارات ، كل إدارة لها اختصاص
و كل الإدارات دى تتبع بشكل مباشر "ديوان الوزارة " حيث مقر وزير الصحة.

طب الاول هى فين وزارة الصحه؟
وزارة الصحه لها أكثر من مبنى ، المبنى الرئيسي و المبنى الجديد موجودين فى شارع الفلكى قصاد مبنى السفارة التركية ،
أى حد من رمسيس (محطة مصر) ، ياخد المترو ، اتجاه حلوان
و ينزل محطة سعد زغلول ، ومن هناك هايوصل للوزارة بكل إداراتها

أهم إدارات وزارة الصحه هى إدارة التكليف
إدارة التكليف هى الهيئة المسئولة بشكل مباشر عن تنسيق حركة التكليف و حركات النيابات بوزارة الصحه
إدارة التكليف فى مبنى منفصل عن مبنى وزارة الصحه فى نفس الشارع

فيه ادارات تانيه مهمه فى الصحه زى إدارة الطب العلاجى و ادارة الطب الوقائى

إدارة الطب العلاجى دى مسئولة عن النيابات و المستشفيات فى مصر بشكل عام و بالأخص مستشفيات المديريات
و إدارة الطب الوقائى هى المسئولة عن الوحدات الصحيه و يتبعها الإدارات الصحيه التابعه للمديريات بشكل مباشر

التقسيمة بتبقى كالآتى:
الوزارة بتبعها فى كل محافظة حاجه اسمها مديرية الشئون الصحيه
مديرية الشئون الصحيه هى أكبر سلطة تابعه لوزارة الصحه فى كل محافظة
يعنى مديرية الصحه دى هى وزارة الصحه بتاعت المحافظة

مدير المديرية بيبقى "وكيل وزارة الصحه بالمحافظة"
زى مثال مديرية الشئون الصحيه بالقاهرة ..

مديرية الصحه تخضع بشكل مباشر للقطاعين العلاجى و الوقائى بالوزارة
كل مديرية بيبقى فيها قطاع علاجى و قطاع وقائى عشان كدا هى تابعه للقطاعين دول فى الوزارة

القطاع العلاجى فى المديرية بيبقى مسئول بشكل مباشر عن مستشفيات المديرية دى
زى مثال مستشفى المنيرة العام تابعه بشكل مباشر لمديرية الصحه بالقاهرة

القطاع الوقائى فى المديرية بيبقى مسئول بشكل مباشر عن الإدارات الصحيه التابعه للمديرية

يعنى إيه الإدارات الصحيه أو المناطق الصحيه؟
كل مديرية بتبقى مسئولة عن محافظة كاملة ، كل مديرية فى كل محافظة بيبقى تابع لها مجموعه من الإدارات و الإدارة دى بتبقى فرع للمديرية فى منطقة معينه داخل نفس المحافظة.
كل محافظة بتبقى متقسمة مناطق و كل منطقة مسئول عنها إدارة ، زى منطقة مصر القديمة مسئول عنها ادارة مصر القديمة الصحيه و منطقة المعادى مسئول عنها إدارة المعادى الصحيه .. إلخ

كل إدارة لها مدير إدارة و دا مديره المباشر هو وكيل الوزارة (مدير المديرية )
مدير الإدارة بيبقى هو المدير المباشر للطبيب البشرى (مدير الوحده الصحيه ) اللى هو حضراتكم

كل ادارة صحيه بيبقى تابع لها مجموعه من الوحدات الصحيه و مكاتب الصحه اللى بيتم توزيع الاطباء البشريين حديثى التخرج عليها لقضاء فترة التكليف كممارس عام !

دى كانت معلومات سريعة عن مفهوم التكليف و هيكل وزارة الصحة ... لو عندك اى سؤال او استفسار تحت امرك.
 



التعديل الأخير:

قد يهمك ايضاً !

ahmed Makboul

New member
طب بيعتمد مكان التكليف علي الجامعه بتاعتي ولا محل الاقامة الموجود في البطاقة...طبعا بعيدا عن مجموعي
و ياريت بردو اعرف بينطبق الموضوع ده بردو علي نيابتي ولا لا؟ شكرا
 

MaHmOuD MyStErO

Administrator
طاقم الإدارة
Team Member
طب بيعتمد مكان التكليف علي الجامعه بتاعتي ولا محل الاقامة الموجود في البطاقة...طبعا بعيدا عن مجموعي
و ياريت بردو اعرف بينطبق الموضوع ده بردو علي نيابتي ولا لا؟ شكرا
وقت التقديم للتكليف بتختار على حسب محافظة الجامعة ام محافظة السكن ...
النيابات على حسب الإعلان و الإحتياجات و الاماكن المتاحة مش شرط المحافظة...
 

Hamada mohammed

New member
انا خريج دفعة 2017 ما قدمتش على التكليف اساسا يعني لم افتح الموقع من الأساس كل اللي عملته بعد التخرج اني جبت مزاولة المهنة من وزارة الصحة و سافرت دلوقتي عايز اروح اسجل في النقابة ايه المطلوب مني عشان موضوع التكليف ده ايه الإجراءات و تقريباً الوقت المطلوب اد ايه عشان اسجل في النقابة عشان انا مرتبط بشغل
 

MaHmOuD MyStErO

Administrator
طاقم الإدارة
Team Member
انا خريج دفعة 2017 ما قدمتش على التكليف اساسا يعني لم افتح الموقع من الأساس كل اللي عملته بعد التخرج اني جبت مزاولة المهنة من وزارة الصحة و سافرت دلوقتي عايز اروح اسجل في النقابة ايه المطلوب مني عشان موضوع التكليف ده ايه الإجراءات و تقريباً الوقت المطلوب اد ايه عشان اسجل في النقابة عشان انا مرتبط بشغل
التسجيل فـ النقابة امر بسيط جدا ان شاء الله

اما حوار التكليف لازم تراجع ادارة التكليف فى وزارة الصحة ..
 

Mostafa Essam TE

New member
أنا فاهم انه لو عندك جيش هتستلم بعد الامتياز تكليفك لحد ميعاد الجيش تمام .. في حالة انك و المعجزة حصلت و اخدت اعفاء ..هترجع تكمل تاني فترة التكليف ؟
 
أعلى