MaHmOuD MyStErO

Administrator
طاقم الإدارة
Team Member
مجموعة كبيرة جدا مننا اكيد تعرف عن الزمالة الريطانية او المعادلة البريطانية ، وفيه مقالات كتير جدا بتتكلم عن طريق الأطباء الى بريطانيا و عن ازاى تبدأ و تجهز نفسك و تذاكر و كمان تسافر..
لكن ناس كتير بتيجى عند نقطة الشغل و التخصص و الاندراج فى النظام الطبى هناك و النيابات و بتبدأ تتوه و مبيكنش فيه معلومات عنها كتير قبل السفر ..

علشان كدة و بعد بحث مطول قررنا نجهز دليل كامل لمفهوم النيابات و التخصص للأطباء فى بريطانيا..وخصوصاً ان النظام هناك مختلف تماماً عن نظامنا فـ مصر .

لكن قبل ما اتكلم عن اى حاجة فيه مصطلحات كتير اكيد سمعتها قبل كدة و حيرتك زى مثلا FY1, CT2, ST4 و غيرها من المفاهيم المختلفة ...
شوف الجدول دة و اللى بيوضح اكثر المفاهيم شيوعاً

مفاهيم نيابات الأطباء فى بريطانيا


1019


نتكلم بأة عن مفهومين بتسمعهم كتير جدا و هما TRAINING JOBS و NON-TRAINING JOBS و ايه الفرق بينهم.

TRAINING JOBS

ببساطة خالص نقدر نشبه الفترة دى بفترة النيابة فى مصر، يعنى حضرتك بتستلم وظيفة فى مستشفى ما ، و بتكون فيها تحت التدريب و كل متدرب بيكون ليه رقم خاص بيه “National Training Number” ، اللى هو اختصاراً " NTN " .. و بتكمل فيها بشكل مستمر سنة ورا سنة لحد ما تبقى استشارى فى تخصصك و اللى تعتبر اسرع و اقوى طريق للحصول على التخصص فى بريطانيا لكن للاسف الوظائف دى بتكون محدودة و عليها منافسة كبيرة جداً.
و بالرغم من ان الطريق دة يعتبر اسرع طريق الا انه طويل جداً ، و دة لان عدد ساعات العمل فى بريطانيا قليلة و الأجازات كتير جداً فـ المدة بتكون طويلة لحد ما تخلص البرنامج التدريبى كامل.
وفـ خلال فترة التدريب الوظيفيى دى بتقبض مرتب ممتاز جدا تقدر تعتمد عليه ان شاء الله.

NON-TRAINING JOBS

عبارة عن وظيفة ثابتة غير تدريبية ممكن تكمل فيها ان شالله 20 سنة، فـ الطريق دة هتبقى شغال اه لكن مش هتعرف تكون استشارى و هتفضل كأنك نايب جديد بتتلقى التعليمات و بتقوم بالمهام اللى بيقوم بيها اى نايب صغير ولست صاحب قرار... يبقى الأفضل انك تبدأ فى طريق الـ TRAINING JOBS

طيب شوف كدة المخطط اللى جاى دة و اللى بيوضح الطريق الكامل للـ SPECIALTY TRAINING بشكل عام :

مخطط يوضح فترة النيابة و التخصص فى بريطانيا


نبدأ بأة نتكلم خطوة خطوة و بالتفصيل الممل ،
اى حد ايا كان عايز يمارس مهنة الطب فى بريطانيا من جوا او من برا و انهى كلية الطب لازم و لابد يمشى فى طريق واحد و ثابت ...
امال ايه بأة اهمية الزمالة او المعادلة !!؟:unsure: - لا حضرتك دى شهادة لازم تاخدها علشان تعادل شهادة البكالوريوس بتاعتك من مصر بشهادة الطب فى المملكة المتحدة
و بعدها تبدأ تكمل طريقك كأنك طبيب متخرج من كليه طب فى المملكة المتحدة ( تمام كدة ! :oops: )

نبدأ بأة فى طريقك بعد ما أخدت زمالة او معادلة .. أول حاجة سنة تدريب تأسيسي اسمه foundation training و بعدهم سنين تدريب التخصص specialty training و اللى بيكونوا 3 سنين كاملين لو حضرتك ناوى تكمل هناك ممارس عام " على فكرة دة تخصص هناك - زى تخصص طب الأسرة كدة " ، او ممكن يكونوا 8 سنين كاملين لو عايز تكون اخصائى و استشارى فى تخصص معين. و على فكرة كل سنين التدريب دى بتقبض فيها و مدفوعة الأجر طبعا.

بعد انتهاء سنين التدريب بتحصل على شهادة معتمدة من GMC اسمها شهادة Certificate of Completion of Training (CCT)

FOUNDATION TRAINING

Foundation-training-in-the-UK


الـ foundation training دى تقدر تقول عليها حاجة زى فترة الإمتياز عندنا فـ مصر ، و دى فترة لازم و لابد اى خريج كلية طب فى المملكة المتحدة يمر بيها ..
و هى عبارة عن سنتين : اول سنة Foundation Year 1 FY1 or F1 ودى اول فترة تدريب للخريج الجديد و دى زى سنة الإمتياز فى مصر بالظبط ، علشان كدة شهادة الإمتياز بتاعة حضرتك فى مصر بتغنى عن السنة دى فى السفر . ،، أما تانى سنة Foundation Year 2 FY2 or F2 فهى سنة تدريبة إضافية لإكتساب مزيد من الخبرات قبل ما تدخل فى برنامج الـ specialty training و تقدر تقول حاجة زى سنة التكليف فى مصر ،، و دى تعتبر او الطريق ليك فى بريطانيا Foundation Year 2 ..


GP TRAINING

GP-training-pathway-in-the-UK


نفترض ان حضرتك حابب تكمل كممارس عام فى بريطانيا، زى ما قلت بعد انتهاء سنة التدريب الـ foundation training حضرتك هتاخد 3 سنين تدريبية اخرى و ممكن يكونوا 4 .. علشان تاخد شهادة و رخصة مزاولة المهنة كممارس عام.
و برده تقدر بعد كدة تكمل برنامج تدريبى تخصصى لو حابب تاخد تخصص معين هناك يندرج تحت عملك كممارس عام زى Women’s Health or Minor Surgery.


SPECIALIST TRAINING

طيب علشان حضرتك تاخد هناك تخصص معين و تكمل فيه و تكون استشارى فيه عندك نوعين من برامج التدريب uncoupled او run through و دة بيعتمد على التخصص اللى حضرتك هتختاره و ناوى تكمل فيه ان شاء الله..

Uncoupled specialty training

Uncoupled-specialty-training-pathway-in-the-UK


فـ الـ uncoupled training سنين التدريب بتتقسم core training و higher specialty training
الـ core training بيكون من سنتين لـ 3 سنين بناءاً على التخصص | The first year of core training is termed CT1, the second year CT2, and then CT3
بعد كدة بتدخل على الـ higher specialty training و بتكمل فيها باقى سنين التدريب فى التخصص و بيكون مسماها ( ST )
Uncoupled specialties
بتشمل All branches of Internal Medicine, most surgical specialties, Anaesthetics, Emergency Medicine & Psychiatry.
Run through specialty training

Run-through-specialty-training-pathway-in-the-UK


بس عبارة عن مسمى وظيفى مختلف لتخصصات مختلفة و بتبدأ فى سنين التدريب و بتكمل بشكل مستمر سنة ورا سنة لحين انتهاء البرنامج التدريبى.
Run through specialties
بتشمل Paediatrics, Obstetrics & Gynaecology, Ophthalmology, Radiology, & Neurosurgery.

SUBSPECIALTY TRAINING (POST-CCT FELLOWSHIP)

Subsepcialty-training-pathway


نفترض مثلا دلوقتى ان حضرتك الحمد لله كملت فى تخصص الباطنة العامة و اصبحت استشارى باطنة عامة وحابب تاخد تخصص كارديو مثلا او شيست او غيره من الباطنة التخصصية..!! - هتيجى بعد ما تكون انهيت الـ 7 - 8 سنين Specialty Training و تاخد سنة او اتنين Subspecialty Training فى التخصص..:cautious::cautious:


SPECIALTY EXAMS

كل تخصص ليه امتحان او مجموعة من الامتحانات خاصة بيه لازم تكون ناجح فيها كلها قبل انتهاء سنين البرنامج التدريبى و مش هتاخد شهادة التخصص غير بعد النجاح فى امتحانات التخصص ، يعنى مثلا كل المتدربين فى تخصص الرمد لازم ينجحوا فى امتحان الزمالة البريطانية لتخصص الرمد (FRCOphth) قبل ST7 علشان ينهوا البرنامج التدريبى و ياخدوا شهادة التخصص CCT.

ان شاء الله المعلومات دى تكون كافية و مفيدة و تساعدك على فهم النظام الطبى و النيابات و التخصص للأطباء فى بريطانيا.
و باذن الله قريب جداً هتكلم عن الية اختيار التخصص و القواعد و الشروط و اسهل الطرق لاختيار التخصص فى بريطانيا.

متابع فى الكومنتات لو فيه ا استفسار او نقطة مش واضحة ،، بالتوفيق
 



قد يهمك ايضاً !

Mhmh

New member
جزاك الله خيرا على المعلومات الطيبه بس انا كنت عايز اعرف بعد ما خلصت المعادله وسجلت اسمي في gmc ازاي اقدر أبدأ يعني هعمل ايه هقدم على ايه وفين
 

Mhmh

New member
بس NHS دي وظائف انا عايز مثلا اقدم على تدريب التلات سنين بتاعة gp عشان اخلصهم وابقي اخدت التخصص اقدم ازاي بقى
 

MaHmOuD MyStErO

Administrator
طاقم الإدارة
Team Member
جزاك الله خيرا على المعلومات الطيبه بس انا كنت عايز اعرف بعد ما خلصت المعادله وسجلت اسمي في gmc ازاي اقدر أبدأ يعني هعمل ايه هقدم على ايه وفين
انا سمعت اني المفروض بعد ما اسجل في gmc المفروض اقدم في NHS
بس NHS دي وظائف انا عايز مثلا اقدم على تدريب التلات سنين بتاعة gp عشان اخلصهم وابقي اخدت التخصص اقدم ازاي بقى
اول خطوة بعد المعادلة ان حضرتك تدور و تقدم على Training او non training job و دى باذن الله هنتكلم عنها فـ توبيك مستقل بشكل مفصل قريب جدا ان شاء الله
 

Pediatricahmad

New member
السلام عليكم, جزاكم الله خيراً ....
أنا اختصاصي في طب الأطفال واحمل شهادة الماستر من سوريا
بعد النجاح في PLAB 2 , هل يمكن بعد النجاح في امتحان MRCPCH بمراحله الثلاث, أن أعمل في بريطانيا كاختصاصي طب الأطفال؟
 

Mohammad Sbinati

New member
شكرا لمجهودك يا دكتور .. اللي فهمته من كلامك هنا اني بعد امتحانات الزمالة اقدر ادخل training program or non training job في بريطانيا و اكمل بقا الطريق صح كده؟ .. نفس النظام في irleland؟
 
أعلى