دليل الطالب القلقان من الامتحان

Ahmed Sholah

New member
7 خطوات قبل الامتحان و 7 خطوات في الامتحان

27jan7y7uchemexamc.jpg


القلق قبل الإمتحان :
1- ضع الأمور في حجمها الطبيعي
فكر نفسك دايماً إن الامتحان الجاي ده مهم لكن مش واقف عليه مستقبلك كله
مهما كان ادائك في الامتحان مش هتطلع منه طريقك مسدود مسدود مسدود
لسه في فرص كتير في المستقبل تثبت فيها نفسك وتحقق طموحك

2- افتكر كل نجاحاتك في الماضي
افتكر كام امتحان عدى عليك في حياتك وكنت قلقان منه وحليت فيه كويس جداً
فكر نفسك بإنجازاتك وإنه بسبب كرم ربنا أولاً ثم مجهودك وتعبك ثانياً انت بقيت في المكان اللي انت فيه حالياً وبتنافس أنجح طلبة في سنك

3- غمض عينك واتفرج على سيناريو إنك حليت حلو في الامتحان
شغل الشريط من الأول في دماغك من أول اللحظة اللي هتصحى فيها يوم الامتحان لغاية اللحظة اللي بتسلم فيها ورقة الاجابة في نهاية الامتحان (والهم انزاح من على كتفك)

4- جميل إنك تعيش جو الإمتحان بالظبط وتدرب نفسك عليه قبله
اعمل لنفسك امتحان (أو هات امتحانات من السنين اللي فاتت جاهزة) واقعد حلها كإنك في الامتحان فعلاً .. وجرب تشوف نفسك لما تتوتر وتشوف أسئلة مش عارفها هتعمل إيه (هقولك تعمل إيه لما تتوتر في الامتحان بعد شوية ??) .. ولو قلقان من ان الوقت يكون ضيق في الامتحان الحقيقي .. اعمل الامتحان التجربة بوقت ودرب نفسك على ضغط الوقت

5- حاول تنام كويس في الكام يوم اللي قبل الامتحان
نومك كويس في الايام دي هيساعدك في التركيز أكتر في المذاكرة والسيطرة على قلقك في نفس الوقت

6- القلق الزيادة بيزود تأثير الكافيين والعكس
فحاول تقلل من الكافيين في أيام الامتحانات بالذات

7- الفايده من الدليل ده مش انك تكون بارد ومش قلقان من الامتحان ..
لإن قليل من القلق بيكون مفيد إنك تجتهد أكتر وتيجي على نفسك .. لكن الفايده إنك تتعلم تسيطر على قلقك وتتعامل معاه صح

--------------------------------------------------------------------------------------------------------------------------------------------------------------------------------------

القلق أثناء الإمتحان :

1- حاول تروح الامتحان بدري بلاش تروح متأخر (مش ناقصة قلق)
وحاول تتجنب الكلام مع زمايلك قبل الامتحان لإن قلقهم هيزود قلقك
ممكن في شوية الوقت ده تمشي رجلك حوالين المبنى شوية وتقول أذكار في سرك (وده هيقلل من توترك كتير)

2- لما تقعد في اللجنة .. فكر نفسك زي ما اتفقنا "قبل كده" إنك هتقابل أسئلة مش عارفها وإن في حاجات في المنهج ذاكرتها وهتنساها (وده طبيعي) ومش لوحدك .. كل اللي حواليك نفس الكلام لا تقلق

3- لو لقيت الامتحان أصعب مما كنت متوقع .. لا تقلق
الامتحان هيكون ساعتها صعب على الجميع مش عليك لوحدك .. وممكن يراعوا الكلام ده في التصحيح ويعيدوا توزيع الدرجات

4- لو لقيت نفسك بدأت تتوتر .. سيب القلم
واعمل التمرين اللي هقولك عليه ده "علشان تسيطر على قلقك"
غمض عينك وابدأ خد نفس براحه (شهيق 7 ثواني وزفير 7 ثواني)
ممكن تكررها 3 أو 4 مرات لغاية ما تلاقي جسمك بدأ يهدى
فتح عينك وادي لنفسك دفعة إيجابية قوية .. قولها "ربنا مش هيضيع مجهودك .. انت تعبت وذاكرت وعملت اللي عليك" أو قولها جملتي المفضلة واللي علطول بقولها لنفسي " أنا موت موتات أحلى من دي بكتير" ??
العملية دي كلها مش هتاخد غير دقيقة من وقتك .. لكن هتساعدك كتير وتستاهل الدقيقة

5- حرك جسمك كل شوية
اتمطع .. افرد رجليك .. لف اكتافك
بلاش تفضل قاعد متخشب طول الـ 3 ساعات

6- شيك على الوقت على فترات .. بلاش كل شوية تبص في ساعتك أو تسأل "باقي قد إيه على الوقت"
مش هتستفيد حاجه غير إنك اتوترت ووترت كل اللي حواليك

7- آخر نصيحة
ذاكر بكل جدية وخليك مستعد تماماً .. لكن فكر في الامتحان على إنه "لعبة"
وانت هدفك إنك تجمع فيه أكتر نقط تعرف تجمعها في الوقت المسموح بيه
بلاش تقف على كل سؤال صعب وتعتبره نهاية الكون .. لو مش متأكد من الاجابة خمن وادخل على اللي بعده .. وفكر نفسك إنك ممكن تضيع شوية نقط في اللعبة وتعدي الـ level في النهاية برده ??

أتمنى يكون الدليل مفيد .. ربنا يطمن قلوبكم ويهدي قلقكم .
 



قد يهمك ايضاً !

أعلى